Saturday, December 24, 2005

December 24

FAREWELE, Advent; Christmas is cum;
Farewele fro us both aile and sume.

With paciens thou hast us fedde
And made us go hungrie to bedde;
For lak of mete we were nyghe dedde;
Farewele fro us both aile and sume.

While thou haste be within oure howse
We ete no puddynges ne no sowce,
But stynking fisshe not worth a lowce;
Farewele fro us both aile and sume.

There was no fresshe fisshe ferre ne nere;
Salt fisshe and samon was to dere,
And thus we have had hevy chere;
Farewele fro us both aile and sume.

Oure brede was browne, oure ale was thynne,
Oure brede was musty in the bynne,
Oure ale soure or we did begynne;
Farewele fro us both aile and sume.

The tyme of Cristes feest natall
We will be mery, grete and small,
And thou shalt goo oute of this halle;
Farewele fro us both aile and sume.

No comments:

Post a Comment